هنيالك يا فاعل الخير!

ساعدونا الله يخليكم_ولا يحرمكوش من أهاليكم_ هكذا رنت فى أذنى تلك الأغنية الفلكلوريه القديمه التى كنا نرددها و نحن صغار واضعين أيادينا بعضها فوق بعض نأرجحها ف الهواء ثم نفلتها مع نهاية الأغنيه نحو صدورنا لترسم صورا تبين الغالب من المغلوب وتقرر من يبدأ بلعب ماتش الكوره الأول ومن سيلعب الثانى_تذكرت هذه الأغنيه حين هممت بكتابة هذا الموضوع أو بالأحرى هذا الاستطلاع _طالبا منكم المساعده_ لا لا ماتفهمونيش غلط _مش طالب مساعده ماديه و نظام حسنه قليله تكفى بلاوى كتيره و هنيالك يا فاعل الخير وكلام من كدا _ لا _إطمنوا_ و لا طالب القرب حتى_مش قبل سنتين_ ما حدث يكفى لسد نفس الواحد عن الزواج سنتين قدام_ _ إنما أنا طالب مساعدتكم فى شيئين أخرين 1_ ف اختيار أكتر موضوع أعجبكم ف المدونه وذلك بعد مرور 8شهور على إنشائها _ ويمكنكم الاطلاع على كل المواضيع مستخدمين الأرشيف فى أعلى جانب الصفحه_ _ 2_ ف اختيار نوعية ما تحبون أن نبدأ به مرحله جديده من الكتابه بهذه المدونه _وشرفونى باختياراتكم و ترتيبكم_حسب الأولويه لكم_وحسب ماتحبون للإختيارات الأتيه: 1_شعرمما أدعى إنى باكتبه و أسميه شعرا وما ارتبط به من ذكريات وتجارب شعوريه_أظنهم بيسموها شعوريه_ وردود الفعل التى قابلتنى_ _ 2_ذكريات من زمن الطفوله الرائعه أيام كنا لانضج ولا نثور_الأرض تدور بأهلها أو لا تدور_كما قال الشابى_ وأيضا المرحله الثانويه والجامعه و نتذكرها معا_ _ 3بعض مشاهداتى ف زامبيا و ما سجلته من ملاحظات_وفروق بين الخلق والفكر والطبع وأسلوب الحياه _ _ 4_نظل نكتب ونهاتى ف الموضوع الكئيب إياه ونقلبها دراما_هه_على رأى ناس أو نشوف أى موضوع تانى بس المهم يكون كئيب _ _ 5_قضايا سياسيه أمثال:رغيف العيش والتوريث فى بلادنا الموروثه و معنى وطن _إلخ _ _ 6_حوار مع النفس أسألها وتجيب عن كل ما يهمها واستقبال أى سؤال أيضا_ _7_دا إقتراح باحس إن فيه ناس عايزه تقوله راح نورده احتراما للرأى الأخر: إقفل أم المدونه دى خااالص بلا وجع دماغ _دوشتنا_ _ _ف النهايه أحب أؤكد على نقطتين :أولا:لو أى حد عنده اختيار واقتراح جديد ياريت يذكره ولكن بعد أن يرتب هذه الخيارات_ _ ثانيا: ممنوع حد يقول: اللى تشوفه أو :كله كويس أو: أنا محتار أو:مش فارقه كله زى بعضه_ _ هى أى نعم مش فارقه بس حاولو تحسسونى إنى باعمل حاجه يعنى_أى منظر كدا_ساعدونا ياحضرات_ حسنه قليله تكفى بلاوى كتيره_و_هنيالك يافاعل الخير