سبتمبر 08، 2007

فى ســـــــــاعة الفطار

رمضــــــــ كريم ــــــــــــان

كل
كل ســــــنه
كل ســـــــــــــنه
كل سـنه
**
كل سنة و أنتو طيبين

كل سنة و أنتم لله أقرب

كل سنه والمسلمون أشد و أقوم

كل سنه و رمضان أكرم و أبهى و أضوأ

و أسمى و أسعد و أتقى و أنقى و أروع و أنفع و أمتع

نقدر نشم نسايم رمضان لما يقرب
أول يوم فى رمضــان له بهاءه و جماله
أحب دايما أتواجد فيه مع الأهل...و مين ما بيحبش؟؟

***
بمناسبة أول يوم ف رمضان وكل أول يوم
أتذكر إنى
فى يوم من أيام الجامعه ... صادف أول يوم فى رمضان
اتأخرت ف الجامعه ...قال يعنى مجتهد
خرجت من جامعتى بالإسماعيليه ..ركبت القطر (بين قوسين القطار) قبل المغرب بحوالى نص ساعه
وكان يلزمنى ساعه على الأقل للوصول لبيتنا
***

أول يوم ف رمضان
كنت أول مرة أفطره بره البيت
و استغليت الوضع و قلت اقول شعر
إحتفالا بهذه المناسبه هههه
لأحيي ذكراها كل عام
و كتبت الافتتاحيه

فى ساعة الفطــــــــــــار *** و الكـــل فى انتظــــــــار
النـــــــــــــاس فى بيوتهم *** و نحن فى القطــــــــــــار


و بس
و ما اعرفتش اكمله من يومها ...يمكن من الجوع !!؟
و يمكن يجى يوم اكمله
***

بس بجد ف اليوم ده شفت مشهد ...عجبنى جدا
رغم انى ماحضرتش الفطار مع العيله ف البيت
إلا إنى لم أشعر بالغربه أبداً
أول مرة كنت أشوف القطر بالصورة دى
ياااااااه رمضان كريم بجد
بجد أحسست كإنى ف بيتى
وبأن كراسى القطر... الإنجليزية الطراز القديمة تحولت إلى كنبات بيتنا (كنبات: جمع كنبه اى اريكه)
و بأن كل من بالقطار هم أهلى
وبإن النسيم اللى يهل على وجهى من نافذة القطار هو ذاته نفس النسيم اللى يأتينى من شباك بيتنا
و بإن ممر القطر أصبح الصاله
و نمر على المحطات و مع كل محطه يقترب وقت الأذان أكثر
يشيع جو من الود أكثر
و بكل محطه - و مع اقتراب موعد الفطار- يصعد للقطار أشخاص ...يوزعو تمر
و من تعذر عليه الصعود للقطار ألقى بما يحمل من خلال النوافذ
و مع إقتراب موعد الأذان أكثر صرت أرى ناس يوزعو كوبايات حليب بالتمر
كنت قبلا أعتقد إن العادة دى موجودة على الطرق السريعه للسيارات و بس
إفادة: تريد تصبح غنى؟؟؟إأستأجر قطارا بركابه و أطلقه قبل الفطار برمضان
على محطات مصر

***

حين أذن المغرب حدث ما لم أشاهده من قبل
تحول القطار كله من أوله لأخره و من فوقه لتحته...إلى مائدة رحمن كبيرة
الجميع يفرش الاكل و الكثير كان يتشارك طعامه مع غيره
رُصَّت أكواب مياه و أكواب اللبن بالتمر
تداخلت أصناف الطعام و التف الجميع حولها
أمتدت إلىَّ...ألاف الأيادى بالطعام
و انطلقت الافواه تعزم بشدة
كنت أرفض...ربما حينها لم أكن أتصور أنى سافطر بالخارج
و هو نفس السبب الذى دعانى ألا اشترى طعاما أصلا ...كان عندى أمل أن ألحق الفطار بالبيت
و مع كثرة الأيادى و العزومات التى تقدمت
و مع حبى لهذا الجو الجميل الرائع الذى شاع فى ذاك اليوم
ما كان أمامى غير إنى أبل ريقى و أخد شقة فول من شخص كان يجلس فوقى
(بين قوسين لا يفهم أحدكم خطأ...فوقى أى فوق الشبكه...شبكة الشنط يعنى )
والشبكة عندنا بمصر تستخدم للبشر فى حالتين... اتنين
إذا لم تجد موضع لقدم فى القطار...أو لأصحاب المزاج
و صاحبى هذا- الذى قدم لى شقة الفول- كان بكل تأكيد من أصحاب المزاج

الذين يجدو راحتهم فووووق... بعيداً عن الخلق
لإن القطر كان رايق فى اليوم ده

شقة الفول باليوم ده كان لها طعم رائع يوازى ديك رومى(الحبش) بجد
و ربما ألهمتنى شقة الفول هذه فكرة لعمل طبق فول السحور ...بالطماطم و التوم فقط دون غيرهم
فن و مزاج و عبقرية إجتمعو فى هذه الشقه ف اليوم ده...كأنها شقه ع النيل مش شقة فول
بس تعرفو؟؟؟؟
يمكن الروعة مش بشقة الفول ف ذاتها ...لا
مصدر الروعة كان بالجو الرائع المحيط بشقة الفول و بينا
***
كل مرة كنت أترك فيها القطار إما مدفوعا بأفواج الجماهير من الخلف
أو مدافعا لأمواج الجماهير القادمه من الأمام
....هذه المره...
أصابنى الشجن و أنا أودع أهل القطار بذلك اليوم
من المرات القليله التى أحزن فيها لفراق القطار

تمنيت لو تتكرر تجربتى هذه مرة أخرى
يوم مماثل لليوم ده
جو رائع زى الجو ده
وجوه و ذوقيات زى الناس دى
لكن بينى و بينكم ...لا
لالالالالا
مافيش أجمل من اللمة مع العيله أول يوم رمضان
و صوت الشيخ محمد رفعت و هو بيجلجل فى السما قبل الأذان
و ألوان زينة رمضان و هى بترفرف فوق روسنا فى طريقنا للبيوت قبل الفطار
و صوت الحلل و المعالق بتلعلع فى المطبخ
و الأم و هى بتنادى علينا اسم اسم
و صوت مدفع الإفطااااااااااااار...إضرب
نزلت من القطر ف اليوم ده و لا زلت أتذكر الجو النفسى الرائع و الوجوه اللى كلها ذوق
و جو الود الهادى
و أيضاً... مقطوووووعة الشعر هههه
و التى أتذكرها بكل أول يوم من رمضان...من كل عام

فى ساعة الفطار *** و الناس فى انتظار
الكـــل فى بيوتهم *** و نحن فى القطـــار

و
كل سنة و انتو طيبين

هناك 16 تعليقًا:

سمسمه يقول...

السلام عليكم كل عام وانت بخير ورمضان كريم يعوده عليك بالخير وعلينا باذن الله
طبعا زى كل مره احب اكون اول واحده انى اعلق
..............
طبعا جميل واحسن حاجه انك تكون بين اهلك اول يوم رمضان ورمضان كله كمان احلى حاجه فى الدنيا بين اهلك .........
بس بجد رائع جدا الموقف القطار دا .........بس تعرفو؟؟؟؟
يمكن الروعة مش بشقة الفول ف ذاتها ...لا

مصدر الروعة كان بالجو الرائع المحيط بشقة الفول و بينا
ربنا يباركلك يارب .......

وتكون مع اهلك على طول وطول الوقت ويخليهمولك يارب ويخليك طبعا ليهم ..........

نوده يقول...

السلام عليكم ورحمه الله وبركاته
رمضان كريم
رمضان كريم وتبقا دايما فى وسط اهلك وطبعا فعلا مفياش احلى من اللمه فى رمضان وبالتحديد لمه الاهل ....
بس بقا تكون باذن الله رمضان الجاى فى بيتك ويكون اهلك حواليك ومع زوجتك الصالحه .........
وكل عام وانت بخير دايما !!!!!!

doctor mohamad يقول...

أهلا سمسمه مرحب بيكى
بمناسبة شقة الفول
بجد كانت لذيذة جدا ف اليوم
و حاولت استلهم منها سر الصنعه
و فعلا صرت اعمل بنفسى فول السحور على مدى أيام مستلهماً روح شقة الفول دى
ههههههههه راح نتغزل بشقة الفول و كأنها شقة مفروشه
مشكورة و نراكى الأولى دايما

doctor mohamad يقول...

اهلا نوده .......
متشكرين خالص ع الدعوة الحلوة دى
اكون مع اهلى وسط بيتنا و معى زوجة صالحه؟؟
اعتقد انى ساعتها اكون جمعت خير متاع الدنيا و يزيد
...اللهم ءامين و أياكم
دميعا بإذن الله
أكرر شكرى

غير معرف يقول...

فى ساعة الفطار *** و الناس فى انتظار
الكـــل فى بيوتهم *** و نحن فى القطـــار

تخيلتك وانت تقول هذا الشعر فى القطار ..كنت فى وضع لا تحسد عليه.. ولكن الحمدلله.. ان المتواجدين فى القطاروالجو العام نساك شوى عن لمة العائلة التى فعلا لا تعوض ابدا ولكن لا نشعر بتلك النعمة الا بعد ان نفتقدها..لقد حصل لى نفس موقفك بس مع فرق كبير جداااا انت كنت فى لمة مع اخوتك المسلمين وافطار كمان وجو رائع اما اناااا فقد وجدت نفسى فى احد ايام رمضان اظن الاواخر منه فى الشارع لوحدى لن استطيع ان اصف تلك الغربة التى حسيت بها وعن دموعى التى لم تسطتع ان تهبط من هول الموقف ..قد يتصور البعض ان احدهم وضع سكينة على رقبتى او شىء من هذا القبيل ..لاا لم يحصل اى شىء من هذا..كل ما فى الامر انى كنت اتسوق فنسيت نفسى حتى قرب اذان المغرب فطبعا قبل خمسة دقائق عن موعد الافطار الكل راح مش عارفة كيف المحلات اقفلت الناس ولا احد الكل راح على منازلهم ..كان المفروض السائق الى وصلنى يرجع على مش عارفة شو حصل بتصل ولا احد بيرد ولا تاكسى موجود ولا شىء فوجدت نفسى فى الشارع وحيدة بلا فطار بلا صلاة بلا اى شىء ما اصعبهاااا من لحظات..لم افكر انشد شعر ههههه لان الخوف جعلنى التصق باحد الشجيرات كالصنم..وبت انعل فيه اللحظة التى فكرت انزل فيها لوحدى والمسافة كانت طويلة وبعيدة عن البيت..حينذاك والله فكرت ان اللمة مع الاهل فى تلك اللحظة بالذات نعمة ...ساااااااعة الفطار واسمح لى يا الشاعر اخذ منك هذه الابيات مع تغير بسيط

فى ساعة الفطار *** و الناس فى انتظار
الكـــل فى بيوتهم *** و نحن فى الشارع

استسمح على الاطالة ..واحيك على هذه المدونة الرائعة
قمر المغرب

غير معرف يقول...

معلش...انا تانى من جديد لم انتبه القافية مش مزبوطة من هول ذلك الموقف بس ينفع هكدا يا الشاعر هههه

فى ساعة الفطار *** و الناس على المائدةمجتمعين
الكـــل فى بيوتهم *** و نحن فى الشارع متسكعين

doctor mohamad يقول...

أهلا بأهل المغرب
أها تم التصحيح؟؟؟
جميل
الأن صارت القافيه مضبوطه
لكن الوزن؟؟؟؟؟
معكى فرصه تضبطى الوزن

غير معرف يقول...

السلام عليكم
رمضان كريم
طبعا اكيد مفيش احسن من اللمه وبالتحديد لمه العائله وكمان لما يكون معاك زوجتك الصالحه ومفيش احسن من الاهل فى الدنيا .....
و صوت الحلل و المعالق بتلعلع فى المطبخ
و الأم و هى بتنادى علينا اسم اسم
و صوت مدفع الإفطااااااااااااار...إضرب.........
اكيد طبعا مفياش احسن من كده حتى لو كبرنا اكيد هنفضل مع اللمه وباذن الله مع اولادك الصالحين .........
وتفضل الام تنادى وكمان فيما بعد تنادى عليك وعلى اولادك .........
واكيد الام توضع جوه عيونى لان مفيش اغلى من الام .......
!!!!!!!!!!!!!!

غير معرف يقول...

هههههههه احاول


الساعة ساعة فطار *** والناس على المائدةمجتمعين
الكـــل راح على بيته *** ونحن فى الشارع متسكعين
شاعرات اخر زمن

doctor mohamad يقول...

امممممممممم
ماشاء الله
حاجه روعه خاااالص
تعبير ايه و بلاغة ايه
و رصانة لغه ماشاء الله
بس هو سؤال صغير......
هو ده شعر؟؟؟
ههههههههه
تقبلى تحياتى و حاولى مرة اخرى ...
الشطر التانى من البيتين أطول من اللازم
يلا اليكى فرصه اخرى...نقول الفرصه متاحه للجميع
على فكرة انا لسه مش فكرت ف الابيات بعد تغيير القافيه...
دمتى و دمتم جميعا بود

غير معرف يقول...

ههههه طبعا هذا مش شعر ولا يحزنون لو

طلع المتنبىء واحمد شوقى من قبرهم اكيد هيقطعونى حتة حتة
....

doctor mohamad يقول...

ههههههه
ما اعتقد يطلعو من قبورهم فى وجود مثل هذا الشعر يا ..غير معرف
ههههههههه
طيب أحاول أنا كمان
القافيه عين؟؟ امممممم
نقول
فى ساعة الفطار..يعلو صوت الجوامع
الناس فى بيوتهم ..و أنتمو بالشارع
مع تحياتى دمتم بود

غير معرف يقول...

ههههه مهو المساكين هيطلعوا من الحسرة..يغيروا المنكر
هههههه
دمتم بود ننتظر الجديد..

david santos يقول...

Thank for your work!


جمال عبد الناصر,

15/1/1918/ - 28/9/1970

The Great, Gamal Abdel Nasser

doctor mohamad يقول...

welcome david
شرفتنا
و ده فعلا تاريخ ميلاد عبد الناصر و تاريخ وفاته
مش فهمت قصدك من وضعهم!!
لكن على كل حال ربنا يرحمه
و انت منورنا
thank u 4 Joining my blog

david santos يقول...

I am very grateful for its words!

David Santos