اللى يحب مابيكرهش _ مين قال؟

قالوا زمان:اللى يحب مابيكرهش _ مين بقى اللى قاااال؟_مين قال؟ ؟ كتير بنسمع الكلمه و بنصدق عليها و بنستعملها دون تمعن فى لفظها أو تأمل فى معناها _ مين قال؟ وهل صحيح فعلا ؟_اللى يحب مايكرهش؟ _ بينى و بينكم أنا نفسى لم أفكر فى صحة الكلمة من قبل _ولم أشغل نفسى بها _ لحد ما حصل معايا موقف خلانى أقف عندها و اتأملها _قبل ما أحكى لكم الموقف خلونا نتفق على شئ :الحب و الكره مش بإيد أى إنسان ولكن ده حكم من محكمة القلب المستقله تماما_مش زى القضاء المصرى_ بيصدر على الأشخاص اللى بتعرفهم بناءا على أفعالهم أو أقوالهم أو مجرد نظرة عينيهم أو نبرة صوتهم_أو حتى معلومه عنهم _ _ _ ملحوظه:التعريف ده من عندى بس هو اللى كدا شكله حلو _ _ أما الموقف فهو إنى كنت باحب شخص جدا والأن أكرهه _وبرضك جدا _ تمت_ _ _وكلما صارحت أحدا بما أجد ردد على الفور: لاااا اللى يحب مابيكرهش _ _ _ لحد ما أيقنت فعلا أن هناك فرق بين المعرفه و الإدراك و بين إنك تسمع و إنك تجرب_ _ _وأنا لما باقول فباقول بعد تجربه صادقه غير مجرد واحد سمع المقوله فحفظها و رددها _ ودلوقت باقولهم بمنتهى اليقين: صدقونى اللى حب بيكره _ _ _بس تعالو نفكر فيها_ يعنى إيه اللى بيحب مابيكرهش؟تعرفو؟ كل لما أسمعها أفتكر الطماطم_ _ إيه! طماطم! _ _ أيوه طماطم_مش عارف ليه!_بس يمكن علشان الطماطم _ أممم عارفين الطماطم و هى خضرا؟ مع الأيام بتحمر وماعندهاش غير إتجاه واحد بس _ نحو الإحمرار_ وما بترجعش خضرا تانى طبعا _ أهو باحس إنهم بيتعاملو مع القلب كإنه كيلو طماطم ما يعرفش غير إتجاه واحد مع الأيام _ يحب و بس _ _ ناسيين إن كدا مصيره ف النهايه إنه يتفعص و يتحط ع الشوربه جنب الرز بالقوانص و المقلوبه _ _ _ والله تشبيه جميل و ماشى مع بعضه _حتى إن اللون الأحمر يمشى مع الحب _وحتى الفعص بيمشى مع البهدله القلبيه بعد كل تجربه وجدانيه_لا مش تجربه_بعد كل دهسه وجدانيه __دهسه بمعنى دوسه أى فرمه و هى أجمل ف التعبير و أدق ف المعنى وأوقع ف الأرض _يوووه_ ف النفس أقصد _ _ _ ما علينا _ _ القصد _ياجماعه القلب مش مقصور على أتجاه واحد و بس _لأ_ بل يحب و يكره _بل و نفس الشخص_ والنفس الإنسانيه أعمق مما نظن _ _ تأملو معى كلمة الإمام على الرائعه: أحبب حبيبك هونا ما عسى أن يكون بغيضك يوما ما _ و أبغض بغيضك هونا ما عسى أن يكون حبيبك يوما ما_ _ _ أمممم _ها ؟ أعتقد حبيبك بيكون بغيضك _والعكس _ فالقلوب بين إصبعين من أصابع الرحمن يقلبها كيف يشاء _ و اتأملو معايا هذا الشعر لإيليا أبى ماضى أمير الشعراء عندى _ _ و رغم إنى أحفظ هذه القطعه عن ظهر قلب منذ زمن إلا أنى أراه هذه المره بمنظور أوضح بعد أن صارت معانيه واقعا و فكرته ملموسا عندى _ _ حيث يقول: رب شئ كنت لما كان عندى أتقيه _ _ صرت لما غاب عنى و توارى أشتهيه _ _ ماالذى حببنى فيه ! وما بغضنيه؟ _ _ أأنا الشخص الذى أعرضت عنه!؟ _ _ لست أدرى _ _ _ يعنى ببساطه اللى يحب يقدز يكره والعكس صحيح ولو جينا لشعرنا العامى خصوصا المغنى منه سنجد الكثير لكنى هاستأذنكم أستغله ف إيراد معنى تانى متمم لمعنى البغض بعد المحبه _ وهو عدم المسامحه _أو بمعنى أدق عدم قدرة الإنسان على التسامح_ لفت نظرى على سبيل المثال الكوبليه الأخير من أغنية بلاش عتاب لعبدالحليم _رغم أنى مش من هواة سماع الأغانى كما يتبادر لذهنكم إلا إذا ابتعدت عن الرومانسيه و كانت كلماتها جيده_بس اللى كاتب هذه الأغنيه بجد صور تماما بكلماته مابداخلى: أبدا _ مش هاقدر اسامحك _إبعد _ خليك ف مكانك_ _ _ يعنى مش أنا بس اللى مش قادر أسامح! _ _ _ ولما كنت بأكلم زميل لى ف المعنى ده فوجئت به بيسمعنى أغنيه لعلى الحجار إسمها إعذرينى_ برضك الكاتب أتى بنفس المعنى ف الكوبليه التالت تقريبا _ ياريت اللى يقدر يسمع الأغنيتين يكتب المعنى بدقه أكتر_ _ يعنى فعلا الوضع الطبيعى بعد كتير من حالات الإساءه بيكون كره لا تملك منعه لمن كنت تحب_كره مصحوب بعدم قدره على التسامح _ غصب عنك_ مش بإيدك_ _ _ القصد:اللى يحب يقدر يكره بل و أضيف إن الكره بيكون على قدر المعزه السابقه و على قدر المحبه اللى كانت وأيضا على قدر الإساءه اللى اتوجهت لك_ _ كل ما كنت بتحب الشخص ده و تعزه كل ما كان كرهك له أزيد بعد إساءته لك_ خصوصا إذا كان قطيعه بلا عوده ولا أمل ف العوده _ _تخيلو بقى معايا لو أعز شخص كان ليك بعد أمك وأبيك أساء لك أبلغ إساءه حصلت لك ف حياتك__ تخيلو انتو بقى و بلغونى _ _ _ و هاأنا الأن أردد مع إيليا أبى ماضى شاعر الطلاسم: ماالذى حببنى فيه؟ و مابغضنيه؟!_ لست أدرى_ _ف النهايه : ده مجرد رأى يحتمل الخطأ أود أسمع أراءكم